¨¨¨™?¦?™¨¨¨°باريس عاصمة النور والجمال .. وهي احدى المدن الفرنسية الجميلة ¨¨¨™?¦?™¨¨¨°
يلآ نبدأ بالمناطق في باريس حيث ان باريس تنقسم الى عشرين منطقه
وتسميتها تبدا من باريس واحد الى باريس عشرين ... طبعاً احلى المناطق
واشهرها هي باريس ثمانيه .. بسبب وجود شارع المشاهير الشانز اليزيه
وبعض الشوارع الاخرى مثل الافنيو مونتين وسان اونوريه (او سانت
هونور )
يبدا الشانزليزيه من المسلّة المصرية في منتصف ساحة الكونكورد وينتهي بقوس النصر
وانت ماشي على الشانزاليزيه راح تشوف جميع جنسيات العالم ... والحركة
فيه تبدا من الصباح بافتتاح اليابانيين وتنتهي في حدود الساعة خمس ..
وطبعاً آخر من يمشي فيه ربعنا السعوديين
يبدا الشانزليزيه بقوس النصر
ARC DE TRIOMPHE وارتفاعه ياصل الى 110 متر اذا طلعته
يعطيك بانورما على الشانزاليزيه ولا اروع منه
ومن المقاهي المعروفه هناك قهوة باريس Cafe De Paris وهالقهوة اكثر اللي يجونها اجانب وهي جنب الفوكيت ... ويجي بعدها قهوة لو دوفيل Le Deville .. ::1t:: هالقهوة ماتسكر الا الساعة 2 في الليل .. تلقى غالبية اللي جالسين فيها حاجزين طاولاتهم من بدري (السعوديين بس!! ) .. مع العلم ان فيه قهاوي افضل منها بكثير .. بس هالعالم تعودوا .. من بعد الساعة 10 في الليل يجي مهرج جزائري بشنطته ويجلس يستهبل على اللي رايح واللي جاي (والله ياهو ابلش اليابانيين ) ولكنه مايتعرض للسعوديين (بلاه التصطير اللي جاه من ثلاث سنوات ) وبعد مايخلص استهباله يلم قاسمة الله من اللي جالسين
ويجي بعد الدوفيل .. قهوة رينو Renault وهالمقهى راقي وهادئ في
نفس الوقت .. وصاير داخل معرض رينو للسيارات.. جنبها على طول
هاجن داز Häagen-Dazs سلملي على وهالمكان معروف عند كثير من
الناس ببيع الايس كريم .. والجلسة في هالمكان تحلو في اخر العصر .. لدرجة انك بتلقى عليه سرا ناس يبون يجلسون فيه .. وفي هالفترة يجي نفس ا
لمهرج الجزائري المذكور اعلاه
وفي الجهة المقابله من الهاجن داز تجي قهوة الماريوت (انواع التسدح انا بها القهوه)Marriottوهالقهوة في نظري انا من احلى القهاوي .. والسبب ان اللي يخدمون فيها نفسياتهم حلوه غير اللي في القهاوي الثانية وكمان علشان ساكن بنفس الفندق ..وهي تقفل الساعة 12 في الليل ... وتجي بعدها بمسافه قهوة اسمها مدريجال Le Madrigal هذا احلى وقت لها اول العصر .. برضه الجزائري المذكور اعلاه يجي فيها هالحزه ( وهنا انجلد )
طبعاً المقاهي كثيره بس اللي ذكرته هنا اشهرها
بالنسبة للمطاعم عد واغلط .. منها الفوكيت اللي تكلمنا عنه قبل شوي يوجد في داخله مطعم فخم لكن اكله بصراحه مهوب الى هناك ... وفيه بعد مطعم ماسيون دي السياس MAISON D'ALSACE وهالمطعم من احلى المطاعم اللي تقدم المأكولات البحرية وبصراحه كل ما مريت من عنده لقيته فاتح مابعد شفته مقفل ابد بتلقى ناس كثير طالبين طبق مكون من ثلاثة ادوار ماكولات بحريه اشكال والوان ولكن مشكلتها انها نيه .. يعني لاتغلط وتطلبها والا بتبلش فيه مثل بعض الناس .. الله يديم النعمه .. الطعم رايح فيها لدرجة ان الطرار انحاش يوم عطيته قطعه من اللي فيه ... وفيه مطعم بيتزا بينو Pizza Pinoوهو تقريباً اشهر مطعم في الشانز اليزيه تلقى ربعنا مسنترين فيه من بعد الساعه 2 في الليل .. وقدامه مطعم بيتزا روما Pizza Rome وتقريباً نفس الاكل اللي عند بيتزا بينو.. عموماً غالبية المطاعم بالنسبة للمشروبات تلقاها ماتقدم الا اورنجينا والا كوكا كولا او كوكا لايت .. لاتبلشهم عندكم ببسي والا ميرندا والا مدري ايش ... في الجهة الثانية من الشارع يوجد مطعم بلانيت هوليوود Planet Holywood والمطعم هذا ما اتوقع فيه احد مايعرفه .. لايفوتكم الفاهيتا عندهم تراه خطييييير ...
مطاعم الوجبات السريعه المشهوره في الشارع هم ماكدونالدز McDonald's ومطعم كويك Quek .. هذولا اللي اتذكرهم .. الباقي ناسي اسماءها او بالاصح مافيه امل اتذكرها
نجي للفنادق .. طبعاً مافيه احد مايعرف فندق الماريوت Marriott.. وهالفندق صاير في قلب الشارع ولاعليه كلام ... جنبه شقق فندقيه اسمها كلاريدج Claridge حلوه بس مشكلتها انها شوي قديمه .. لو سكنت فيها وصادف ان الجو حار تقدر تطلب مكيف للغرفه .. لانها تجي بدون مكيفات .. ولهواة الطبخ اطلبوا مواعين ولاتستحون .. خلوهم يجيبون المعاميل كلها وترا عندهم زمزميات للقهوة والشاهي ... وهالثنين هم الوحيدين اللي في الشانز اليزيه .. لكن فيه حولهم فنادق كثيره منها : كاليفورنيا ، كلاريدج بولمان ، تشاتو فرونتناك ، ورويك ، وكونكورد لافاييت .. وهالاخير هو ابعدهم .. بينه وبين الشانز من 10 دقايق الى ربع ساعه مشي ... وغيرها كثير
الصرافين الموجودين في هالشارع بتلقاهم منتشرين في كل جهه .. طبعاً يبيلك تشوف من احسن واحد فيهم سعر .. هالكلام في حالة انك جاي للبلد مامعك يورو .. وانا اشوف ان افضل اثنين هم اللي موجود المجمع التجاري اللي فيه فناك FNAC والثاني في المجمع التجاري اللي فيه بلانيت هوليوود .. والاخير يبيع بطاقات مكالمات دوليه ... وبالنسبة لبطاقات اعادة التعبئه للجوال تلقاها عند فناك FNAC او عند اي محل يبيع دخان TABAC
قبل انهي كلامي عن هالشارع الكبير ابغى اذكركم بنقطه .. انتبهوا من النصابين اللي يجون يقولون حنا جايعين وحنا جايين من قريح وما معنا فلوس وحنا وحنا .. ترى هالاشكال ماوراها الا المشاكل يعني لاتعطونهم وجه ابد ... وبتلقون الطراريين البوسنيين .. والله ياهم علل!! ويجونك بالاسلام ان حنا مسلمين ومدري ايش وهم الله اعلم .. حريمهم تلقاهم يدخنون في وحده من اللفات
<<<<< كافشهم
فيه بزر عله ... والله لو تعطيه مال قارون لازم يسوي حركات نص كم عليك اذا ابعد عنك .. وتلقاه من بكره جاي يشحذ منك ولا كأن شي صار
خلصنا من الشانز اليزيه ومافيه من محلات ومقاهي ومطاعم ونجي للشوارع الثانية المشهوره في باريس
شارع جورج الخامس او افنيو جورج اسانك Av. George V
وياتي في قلب هذا الشارع الفندق العالمي الشهير فندق جورج الخامس Four Seasons Hotel George V واللي تعود ملكيته للامير الوليد بن طلال وهو من اغلى الفنادق في باريس وافخمها ... وجنبه فندق برنس دو قول Prince De Galles ... ويوجد في راس الشارع شقق الكاريدور وهي قريبه مره من الفوكيت ...وقدامها محل يبيع ايس كريم خطييييييييييييير الظاهر ان اسمه بارادايس Paradise اذا ماني غلطان .. لايفوتكم الايس كريم عندهم ..مكتب الخطوط السعوديه في نفس الشارع ورقمهم مميز 0105006565.. وفي الشارع نفسه مطعم عربي اسمه وبقاله عربيه اسمهم الديوان .. اذا حنيتوا للاكل العربي مهوب يخالف تجون تاكلون فيه .. والمطعم صاير في الدور الثاني ويجي فيه غناء في الليل بس احيانا يبيلك تحجز قبل تجي .. وترا مافيه خربطه يعني مناسب للعوائل.. بس مشكلتهم اذا شافوك خليجي محطوك بفاتورة مهيب صاحيه .. يدخلون فيها طلبات ماطلبتها .. عشان كذا يبيلك تدقق في الفاتورة قبل تحاسبهم هذا ... في الدور الارضي من المطعم فيه اكلات عربيه على السريع .. مثل شاورما وفلافل وكبه وانت ماشي .. وفيه بقاله عربيه ...ومن المطاعم العربيه الثانيه مطعم نورا .. ومكانه في خلف فندق جورج الخامس وله فروع ثانيه في باريس ...وفي شارع جورج الخامس مطعم حلو وفخم اسمه فندي FINDI وعلى ما اعتقد انه مايفتح الا في المساء ..في الشارع محل كبير لجورجيو ارماني .. وبوتيك فريه FERRE وفيه محلين حلاقه في نفس الشارع ( رجالي ونسائي ) ممتازين بس الله ياخذهم غالين .. حلاقة الذقن بس بـ 40 يورو والشعر بـ 60 يورو
في نهاية الشارع يجي شارع من العيار الثقيل اسمه افنيو مونتين Avenue Montaigne وهالشارع عليه افخم المحلات في العالم مثل شانيل، وهاري وينستون ، وروبرتو كافالي، ولوي فيتون ( بعض الناس يسمونه لويس فويتن ) وغيرها الكثير من المحلات الفخمة ... ويتربع في وسط الشارع فندق بلازا اثينيه Plaza Athenee وهو من الفنادق الفخمة في باريس ( يعني اذا جلست في الفندق كنك راكب بنتلي )
الرئيسية 